步驟1：取出種子 記住用幾多粒就拎幾多粒出嚟，用唔晒嘅寧願掉咗去，都唔好放返入袋呀。 因為會容易令種子變壞㗎。
步驟2：浸種子 基本上部份殻比較硬嘅種子先需要浸水，但千祈唔好浸得太耐，只需要浸2-3小時便足夠。
步驟3：浸濕種植棉 記得要將種植棉放入水裡面浸至全濕呀
步驟4：入種子 將種子放入種植棉十字位。但千祈唔好放得太入，只需要放响種植棉徧頂位置。因為種植棉密度比泥土高，放太入的話植物好辛苦先可以生長到出嚟㗎。
步驟5：確認種子放入種植棉後正確位置 入咗種植棉嘅種子會睇得到（圖左），但種植棉又會冚住嘅，先至係正確呀。 如果見唔到種子（圖右）就係錯㗎喇。
步驟6：加水入器皿 將已入種子嘅種植棉放入器皿，加水至種植棉一半位置。
步驟7：蓋保鮮紙 呢個步驟大家可以自行決定做唔做。因為用保鮮紙包住作用是保濕呀。 包咗保鮮紙嘅話記住要用牙籤响保鮮紙刺一些小洞，咁樣空氣先可以入到裡面麻。
步驟8：放入陰暗處 我地要模擬返種子响泥土裡面見唔到光嘅環境比佢地，所以响未發芽前都要放响陰暗地方，直至有兩片葉出現，就一定要見光喇。
